Astanadakı dünya çempionatında üç pəhləvanımız məğlubiyyətlə üzləşib

AzadAzərbaycan xəbər verir ki, Qazaxıstanın Astana şəhərində təşkil edilən dünya çempionatında mübarizə aparan üç azərbaycanlı güləşçi xalçadan məğlub ayrılıb. Yarışda Ruzanna Məmmədova (59 kq), Rəşid Babazadə (65 kq) və Maqomedxan Maqomedov (97 kq) uğursuz çıxış ediblər.

Ruzanna Məmmədova 1/8 final mərhələsində Çin təmsilçisi Menqyu Xie ilə qarşılaşmada uduzub. Rəqib idmançı növbəti mərhələdə yenildiyi üçün pəhləvanımız təsəlliverici görüşlərə qatılmaq və medal qazanmaq şansından məhrum olub.

Digər idmançılarımızdan Rəşid Babazadə 1/16 finalda qırğızıstanlı Taiyrbek Zumaşbek Uuluya, Maqomedxan Maqomedov isə 1/4 final dörddəbirində Bəhreyn adına güləşən Axmed Maqomed Tajudinova yenilib. Onların rəqibləri finala vəsiqə qazanacaqları təqdirdə təmsilçilərimiz sabah təsəlliverici görüşlərdə qüvvələrini sınaya biləcəklər.

Qeyd edək ki, daha əvvəl yunan-Roma güləşçilərimizdən Eldəniz Əzizli (55 kq) və Sənan Süleymanov (77 kq) fəxri kürsünün ən yüksək pilləsinə qalxaraq qızıl, Nihat Məmmədli (63 kq) isə gümüş medal əldə edib.