Türkiyə yığmasında qalmaqal: Futbolçular Sergen Yalçının zənglərinə cavab vermir

Türkiyə milli futbol komandasının düşərgəsində baş məşqçi Sergen Yalçın və bəzi oyunçular arasında gərginliyin yaşandığı iddia edilir. Məlumata görə, əsas heyətdə çıxış edən bir neçə futbolçu Yalçının və onun köməkçisinin telefon zənglərinə məhəl qoymur.

Jurnalist Sercan Hamzaoğlunun verdiyi açıqlamaya əsasən, futbolçuların bu cür davranmasının kökündə mütəxəssisin əvvəllər TV-də şərhçi işləyərkən onların ünvanına səsləndirdiyi kəskin tənqidlər dayanır. Oyunçular bu tənqidləri unutmadıqlarını və onun rəhbərliyi altında çıxış etmək istəmədiklərini bildirirlər.

Hamzaoğlu qeyd edib ki, narazı olan futbolçulardan biri ilə söhbət zamanı həmin şəxs Yalçının efirdə işlətdiyi sərt ifadələri xatırladıb və belə bir yanaşma göstərən mütəxəssislə işləməyə həvəsli olmadığını vurğulayıb.

Bütün bunlara baxmayaraq, etiraz edən bəzi futbolçular komandanın düşərgəsinə qatılaraq məşqləri davam etdirirlər. Lakin iddialara görə, onlar hələ də baş məşqçi ilə birbaşa kontaktdan və ünsiyyətdən qaçmağa çalışırlar.