Almaniyada dövlət borcu rekord həddə çatdı və iflaslar artdı

AzadAzərbaycan xəbər verir ki, Almaniyanın dövlət borcu tarixi maksimum həddə çataraq 2,819 trilyon avronu ötüb. Bu barədə ölkə mətbuatı makroiqtisadi proqnozlaşdırma aləti olan “Pleite-Uhr” (Müflisləşmə Sayğacı) hesabatına istinadən məlumat yayıb.

Mövcud hesablama modellərinə əsasən, dövlətdə həm korporativ sektorda, həm də əmək bazarında ciddi çətinliklər müşahidə olunur. İlin əvvəlindən bəri korporativ iflasların sayı 21.303-ə çatıb. Riyazi göstəricilərə görə, ölkədə hər 20 dəqiqədə bir şirkət fəaliyyətini dayandırır. Təkcə oktyabrın 24-dən 28-dək olan dövrdə 357 alman şirkəti özünü müflis elan edib.

Böhrandan təsirlənən müəssisələr arasında 150 illik tarixə malik “Tullau Pappen” kağız fabriki və təxminən 300 işçisinin işdən çıxarılma təhlükəsi ilə üzləşdiyi, “Mersedes-Benz” avtomobil komponentlərinin təchizatçısı olan “Aios” zavodu da yer alıb.

Bununla yanaşı, məşğulluq sahəsində də vəziyyət pisləşməkdədir. Cari ilin əvvəlindən qeydə alınan işsizlik müavinəti müraciətlərinin sayı 5.935.856-ya çatıb. Mütəxəssislərin hesablamalarına görə, Almaniyada hər dörd saniyədə bir nəfər işini itirir.

Qeyd edək ki, yayılan hesabatda Almaniya Federal Statistika İdarəsinin və Almaniya Federal Məşğulluq Agentliyinin son rəsmi göstəricilərindən istifadə olunub.