Çində 500 kiloqram yük qaldıra bilən dörd metrlik nəhəng robot təqdim olundu

AzadAzərbaycan xəbər verir ki, Çində ağır sənaye sahələrində istifadə üçün hazırlanan, təqribən 4 metr hündürlüyündə və iki qolu vasitəsilə ümumilikdə 500 kiloqram ağırlığında yük qaldırmaq qabiliyyətinə malik humanoid robot nümayiş etdirilib. Neo1 adlı bu qurğu NeodraDynamics Robotics tərəfindən ərsəyə gətirilib.

Yeni nəsil robot Çin Beynəlxalq Sənaye Sərgisi çərçivəsində JD Industrial ilə birgə ictimaiyyətə təqdim olunub. Layihənin əsas məqsədi insanların ağır yüklərlə işlədiyi, təhlükəli maddələrlə təmasda olduğu və ekstremal şəraitlə qarşılaşdığı sahələrdə iş prosesini asanlaşdırmaqdır.

Neo1 mürəkkəb hərəkətləri yerinə yetirmək üçün 41 aktiv sərbəstlik dərəcəsinə sahibdir. Qurğunun 39 oynağında rəqəmsal hidravlik ötürücülərdən, digər iki fırlanan oynaqda isə elektrik ötürücülərindən istifadə olunur.

Tərtibatçılar robotun tətbiq sahələrini yalnız zavodlarla məhdudlaşdırmırlar. Neo1-in sənaye limanlarında, nüvə obyektlərində, sualtı mühəndislikdə, mədən sənayesində və fəlakət zonalarında aparılan xilasetmə əməliyyatlarında istifadəsi nəzərdə tutulur.