Süni intellekt xərçəng xəstələrinin ömür uzunluğunu təxmin edir

ABŞ-də mütəxəssislər insan üzünün şəkillərinə əsaslanaraq onkoloji xəstələrin bioloji yaşını və ölüm ehtimalını təyin edə bilən yeni süni intellekt proqramları ərsəyə gətiriblər.

Mass General Brigham tədqiqatçılarının imza atdığı bu layihə 40 milyondan artıq üz fotosu üzərində təlim keçmiş FAHR-Face adlı süni intellekt modeli əsasında qurulub. Nüfuzlu The Lancet Digital Health jurnalında yayımlanan məlumata görə, FAHR-FaceAge funksiyası insanın görkəminə görə bioloji yaşını müəyyənləşdirir, digər alət isə sağ qalma ehtimalını hesablayır.

Şüa terapiyası alan xəstələr üzərində həyata keçirilən təcrübə zamanı diqqətçəkən nəticələr əldə olunub. Süni intellekt tərəfindən bioloji yaşı real yaşından ən azı 5 il çox çıxan xəstələrin 4 il ərzində ölüm riskinin digərlərinə nisbətən 21 faiz artıq olduğu müəyyən edilib.

Əks prosesdə isə bioloji yaşı həqiqi yaşından ən azı 5 il az hesablanan xəstələrdə ölüm təhlükəsinin 17 faiz aşağı olduğu qeydə alınıb. Alimlər bu texnologiyanın ağır cərrahiyyə və intensiv müalicələrdən öncə xəstələrin ümumi fiziki durumunu qiymətləndirməkdə faydalı ola biləcəyini düşünürlər.

Buna baxmayaraq, mütəxəssislər tək bir fotoşəkilə əsaslanan nəticələrin müalicə qərarı vermək üçün hələ yetərli olmadığını vurğulayırlar. Surrey Universitetinin təmsilçisi Miroslav Bober texnologiyanın böyük irəliləyiş olmasına baxmayaraq, hələlik tam klinik tətbiqə hazır olmadığını və əlavə araşdırmalara ehtiyac duyulduğunu bildirib.