Türkiyə Prezidentinin baş müşaviri Oqtay Saral tutduğu vəzifədən azad edilib

AzadAzərbaycan xəbər verir ki, Türkiyə Prezidentinin baş müşaviri Oqtay Saralın vəzifəsindən istefa verəcəyi barədə məlumatlar yayılıb. Qardaş ölkənin media qurumları və sosial şəbəkə hesablarında onun tezliklə postundan ayrılacağı iddia olunub.

Yayılan məlumatlarda qeyd edilib ki, Saralın bir müddət əvvəl Azərbaycan Nazirlər Kabinetinin ümumtəhsil məktəblərində geyim normaları ilə bağlı qərarını tənqid etməsi onun vəzifəsindən uzaqlaşdırılmasına səbəb olub.

Oqtay Saral özü də vəzifəsindən ayrıldığını təsdiqləyib. Türkiyəli jurnalist Tələt Atillaya açıqlama verən sabiq müşavir qərarın Prezident Rəcəb Tayyib Ərdoğanın göstərişi ilə verildiyini bildirib.

Saral heç kimdən incikliyinin olmadığını vurğulayaraq, "Biz vəzifələrlə var olan insanlar deyik. Cənab Prezident məni bu vəzifəyə gətirmişdi, onun göstərişi ilə ayrıldım" deyə qeyd edib. Jurnalistin Azərbaycanla bağlı açıqlamalarının istefaya təsir edib-etməməsi ilə bağlı sualına isə o, "Bəli, elə görünür" cavabını verib.