Avropada Rusiya və Belarusun hibrid hücumları ilə bağlı araşdırma aparılıb

AzadAzərbaycan xəbər verir ki, 2026-cı il aprelin 1-dən oktyabrın 15-dək Avropa dövlətlərində azı 52 insident baş verib. Bu hadisələrin Moskva və Minsk Qərbə qarşı hibrid müharibəsinin tərkib hissəsi ola biləcəyi ehtimal edilir.

Aparılan araşdırmalara əsasən, Avropa İttifaqı məkanında, həmçinin Böyük Britaniya, Norveç və Moldovada baş verən 48 hadisə Rusiya ilə əlaqələndirilib. Daha dörd təxribat xarakterli hadisənin isə Belarusun fəaliyyəti ilə bağlı olduğu bildirilir. Ən çox hücuma məruz qalan ölkə isə 9 insidentlə Polşa olub.

Polşada qeydə alınan hibrid təhdidlər müxtəlif formalarda özünü büruzə verir. Bunlar arasında hava məkanının pozulması, müdafiə sənayesi müəssisələrinə hücumlar və rabitə avadanlıqlarının yandırılması halları yer alır. Latviya, Rumıniya, Litva, Finlandiya, Bolqarıstan və Almaniya da tez-tez hücumlara məruz qalan digər dövlətlər sırasındadır.

Belarusun hibrid taktikasına gəldikdə, tədqiqatçılar bunu əsasən miqrantlar vasitəsilə Aİ sərhədlərinə təzyiq göstərilməsi ilə izah edirlər. Həmçinin mühacirətdə olan müxalifətçilərin izlənməsi və sərhəddə qanunsuz keçid cəhdləri də Minsk hökumətinin hibrid hücumları sırasında göstərilir.