Azərbaycan BMT-də mina təhlükəsi və qanunsuz silah dövriyyəsi məsələsini qaldırıb

AzadAzərbaycan xəbər verir ki, Azərbaycan BMT Baş Assambleyasının 81-ci sessiyası çərçivəsində Birinci Komitənin adi silahlarla bağlı tematik müzakirələrində ölkəmizin işğaldan azad olunmuş torpaqlarındakı mina təhlükəsi və qanunsuz silah dövriyyəsi problemini diqqətə çatdırıb.

Azərbaycanın BMT yanında Daimi Nümayəndəliyinin birinci katibi Məqsəd Hüseynov çıxışı zamanı bildirib ki, təxminən otuz il ərzində həmin ərazilər qanunsuz fəaliyyətlər, o cümlədən silah və döyüş sursatlarının dövriyyəsi üçün "boz zona" olub. Suverenliyin bərpasından sonra sərhəd nəzarəti gücləndirilib.

Müzakirələrdə minaların yaratdığı ağır fəsadlar xüsusi vurğulanıb. Son otuz ildə 3500-dən çox şəxsin mina qurbanı olduğu, 2020-ci ilin noyabrından etibarən isə 443 vətəndaşın partlayışlar nəticəsində ölü və ya yaralı olduğu qeyd edilib.

Qeyd olunub ki, bu təhlükə bərpa işlərinə mane olur və məcburi köçkünlərin təhlükəsiz qayıdışını ləngidir. Problemin həlli üçün beynəlxalq həmrəyliyin və humanitar minatəmizləmə fəaliyyətlərinə dəstəyin artırılmasının vacibliyi vurğulanıb.