Bakının bir sıra rayonlarında və bölgələrdə işıq olmayacaq

AzadAzərbaycan xəbər verir ki, abonentlərin daha keyfiyyətli və dayanıqlı elektrik enerjisi ilə təmin olunması məqsədilə oktyabrın 20-də Yasamal Rayon Enerji Təchizatı və Satışı İdarəsinin xidmət ərazisində Transformator Məntəqəsində təmir işləri aparılacaq. Bu barədə Azərişıq ASC məlumat yayıb.

Görüləcək işlərlə əlaqədar saat 10:00-dan 13:00-dək Lev Tolstoy, Nazim Hikmət, Rahib Tağıyev, Süleyman Tağızadə, Ümid Əkbərov, Vasif Əliyev, Zərgərpalan küçələrində, eləcə də Azərbaycan prospektinin bir hissəsində işıq verilişi məhdudlaşdırılacaq.

Bununla yanaşı, Ağdaş rayonunda 10 kV-luq Ərəbocağı və 2 saylı şəhər hava xətlərində təmir işləri aparılacaq. Buna görə də Cəfər Cabbarlı, İmadəddin Nəsimi, M.Əfəndiyev, Molla Pənah Vaqif küçələri, Su-18 yaşayış massivi və Ərəbocağı kəndinin bir hissəsində saat 10:00-dan 16:00-dək elektrik enerjisi olmayacaq.

Göyçay rayonunun Alıkənd, Qaraxıdır, Qaraman, Ləkçılpaq, Mırtı, Yalman kəndlərinin bəzi ərazilərində isə saat 10:00-dan 15:00-dək hava xəttinə toxunan ağacların budanması və transformator məntəqəsində icra ediləcək təmir işləri ilə əlaqədar qısamüddətli fasilələr yaranacaq.

Yevlaxda da 110/35/6 kV-luq Mingəçevir yarımstansiyasından çıxan 6 kV-luq bəzi fiderlərdə təmir işləri həyata keçiriləcək. Planlı fasilə saat 10:00-dan 15:00-dək Aşağı Salamabad, Bəydili, Əcəmi, Əkşəm, Gülövşə, Hacıselli, Havarlı, Marzılı və Yuxarı Salamabad kəndlərini əhatə edəcək.