Zəngilan şəhərinin işğaldan azad edilməsindən altı il ötür

Azərbaycanın ayrılmaz parçası olan Zəngilan rayonunun işğaldan azad edilməsindən altı il ötür. 2020-ci il oktyabrın 20-də Azərbaycan Respublikasının Prezidenti, Müzəffər Ali Baş Komandan İlham Əliyev xalqa müraciət edərək Zəngilan şəhəri ilə yanaşı, Havalı, Zərnəli, Məmmədbəyli, Həkəri, Şərifan və Muğanlı kəndlərinin ordumuz tərəfindən azad edildiyi müjdəsini vermişdi. Bu zəfər İkinci Qarabağ müharibəsi çərçivəsində həyata keçirilən ən parlaq Arazboyu əməliyyatlardan biri kimi tarixə düşüb.

Rayonun azadlığı uğrunda fədakarlıq və şücaət göstərən yüzlərlə hərbi qulluqçu dövlət başçısının 2020-ci il dekabr və 2021-ci il iyun aylarında imzaladığı sərəncamlarla "Zəngilanın azad olunmasına görə" medalına layiq görülüb. Bundan əlavə, Prezidentin 2023-cü il 31 iyul tarixli sərəncamı ilə hər il 20 oktyabr tarixi Zəngilan Şəhəri Günü kimi qeyd edilir.

Tarixi qələbədən dərhal sonra ərazidə geniş minatəmizləmə, infrastruktur və bərpa proseslərinə start verilib. Böyük Qayıdışın ilk addımı da məhz bu rayonda reallaşıb; "ağıllı kənd" konsepsiyası ilə inşa edilən Ağalı kəndinə sakinlərin köçürülməsinə 2022-ci ilin iyul ayından başlanılıb. Həmin ilin 20 oktyabrında isə rayonda inşa edilən Zəngilan Beynəlxalq Hava Limanı rəsmi şəkildə istifadəyə verilib.

Xatırladaq ki, cənubda İranla həmsərhəd olan, Araz, Oxçuçay, Həkəri və Bəsitçay kimi bolsulu çaylara, zəngin təbii ehtiyatlara malik Zəngilan rayonu 1993-cü il oktyabrın 30-da Ermənistan silahlı qüvvələri tərəfindən işğal edilmişdi. 27 illik işğal dövründə 1 şəhər, 5 qəsəbə və 79 kənddən ibarət olan rayonun zəngin sərvətləri talan olunmuş, evlər və tarixi abidələr vandalizmə məruz qalmışdı. Bu gün isə doğma yurd dirçəlir və sakinlərini qoynuna alır.