İlham Əliyev BMT-nin Terrorçuluqla Mübarizə İdarəsinin rəsmisini qəbul edib

Azərbaycan Respublikasının Prezidenti İlham Əliyev oktyabrın 26-da BMT-nin Terrorçuluqla Mübarizə İdarəsinin Baş katibinin müavini vəzifəsini icra edən Aleksandr Zuyev ilə görüşüb.

AzadAzərbaycan xəbər verir ki, görüş çərçivəsində Azərbaycan ilə BMT-nin müxtəlif struktur bölmələri arasında mövcud olan faydalı tərəfdaşlıq münasibətləri vurğulanıb. Tərəflər ölkəmizin BMT-nin Terrorçuluqla Mübarizə İdarəsi ilə sıx əməkdaşlığına dair bir sıra mühüm məsələləri nəzərdən keçiriblər.

Söhbət zamanı Azərbaycanın beynəlxalq miqyasda terrorçuluqla mübarizə sahəsinə verdiyi əhəmiyyətli töhfələr xüsusi olaraq yüksək qiymətləndirilib.

Bununla yanaşı, Bakı şəhərində təşkil olunacaq Ümumdünya Mədəniyyətlərarası Dialoq Forumunun qlobal əhəmiyyətli mövzuların müzakirəsi baxımından mühüm platforma rolunu oynadığı və bu tədbirin nüfuzunun ildən-ilə artdığı diqqətə çatdırılıb.