Marko Rubio: Rusiya sülh müqabilində yalnız Donbası əldə etmək niyyətindədir

Moskva administrasiyası Ukrayna torpaqlarının təxminən 11 faizini əhatə edən Donbas regionuna nəzarəti ələ keçirməyə çalışır. AzadAzərbaycan xəbər verir ki, bu barədə ABŞ-ın dövlət katibi Marko Rubio açıqlama verib.

Rubionun sözlərinə görə, Rusiya hələlik bu ərazini tam şəkildə hərbi yolla tutmağa müvəffəq ola bilmir. Digər tərəfdən, Kiyev hakimiyyəti də həmin torpaqları könüllü olaraq güzəştə getməkdən imtina edir.

Dövlət katibi qeyd edib ki, Ukraynanın Donbası itirmək istəməməsi ölkənin suverenliyi və milli təhlükəsizliyi ilə birbaşa bağlıdır. Onun fikrincə, mövcud qarşıdurmanı hərbi yolla deyil, məhz diplomatik vasitələrlə bitirmək mümkündür.

Sonda Rubio vurğulayıb ki, əsas məqsəd hər iki tərəfin müəyyən güzəştlərə gedərək ortaq məxrəcə gələ biləcəyi balanslı bir kompromis variantının tapılmasıdır.