Mərkəzi Asiyada rus dili mövqelərini itirir, yerini Çin dili tutur

Rus dili son dövrlərə qədər Kremlin əsas təsir dairəsi olan Mərkəzi Asiya regionunda öz mövqelərini getdikcə itirməkdədir. Qazaxıstan, Qırğızıstan, Tacikistan və Özbəkistan kimi ölkələrdə yerli sakinlər kütləvi şəkildə Çin dilini öyrənməyə başlayıblar.

Ukraynanın Xarici Kəşfiyyat Xidmətinin məlumatına görə, 2024-cü ilin sonuna olan göstəricilərə əsasən, Orta Asiyanın təxminən 150 min sakini Çin dilini mənimsədiyini təsdiqləyən testlərdən uğurla keçib. Regionda bu dili tədris edən özəl məktəblərin sayı yüzlərlə ölçülür, Pekin isə Konfutsiy Məktəbləri vasitəsilə təhsil layihələrini fəal şəkildə dəstəkləyir.

Yerli əhali Çin dilini gələcəyin dili hesab edərək bunu biznes qurmaq, iş tapmaq və ÇXR-də ali təhsil almaq üçün böyük fürsət kimi qiymətləndirir. Çin hakimiyyəti bu istiqamətdə təşəbbüsləri maliyyələşdirir və istedadlı tələbələrə səxavətli təqaüdlər təqdim edir.

Bununla yanaşı, region sakinləri Rusiya Federasiyasını proqnozlaşdırılması çətin tərəfdaş kimi gördükləri halda, Çini daha müsbət və perspektivli tərəfdaş olaraq qəbul edirlər. Yeni ticarət yolları və iqtisadi əməkdaşlıq fonunda Çinin Mərkəzi Asiyanın xarici ticarətindəki payı 40 faizə çatıb, Rusiyanın payı isə azalıb.