Niderland hökumətindən Ukraynaya üçillik maliyyə dəstəyi

Niderland rəhbərliyi Ukraynaya gələcək üç il ərzində 1,2 milyard avro həcmində qeyri-hərbi yardım təqdim edəcək. Bu barədə ölkə hökumətinin yaydığı rəsmi açıqlamada məlumat verilib.

Ayrılan vəsait dövlətin təcili tələbatlarının ödənilməsinə, bərpa və quruculuq tədbirlərinə, həmçinin Niderland şirkətlərinin bu ölkədəki fəaliyyət dairəsinin genişləndirilməsinə sərf olunacaq. Maliyyə paketi ilk növbədə enerji və su təsərrüfatı sahələrini, eləcə də sahibkarlığın dəstəklənməsini əhatə edir.

Niderlandın xarici ticarət və inkişaf əməkdaşlığı naziri Syor Syoerdsma Kiyevə səfəri zamanı bəyan edib ki, Ukrayna güclü hücumlara məruz qalır və qarşıda çətin qış mövsümü dayanır. Onun sözlərinə görə, Ukraynanın müqavimətini davam etdirməsi üçün dəstəyin davamlılığı ümumi təhlükəsizlik baxımından əhəmiyyətlidir.

Proqram çərçivəsində cari ildə enerji infrastrukturunun təcili təmiri məqsədilə Enerji Dəstəyi Fonduna əlavə 40 milyon avro köçürüləcək. Eyni zamanda, Niderland enerji avadanlıqlarının təchizatı üçün 55 milyon avro dəyərində natura şəklində yardım göstərəcək.

Bununla yanaşı, Niderland Ukraynaya 500 milyon avro məbləğində hərbi yardım paketi də elan edib. Həmin vəsaitin bir hissəsinin dronların alınmasına, digər hissəsinin isə hərbi ehtiyacların, o cümlədən hava hücumundan müdafiə sistemlərinin gücləndirilməsinə sərf olunması nəzərdə tutulur.