TƏBİB Qazaxda təcili yardım çağırışlarının başqa rayona yönləndirilməsinə münasibət bildirib

AzadAzərbaycan xəbər verir ki, sosial şəbəkələrdə 103 xidmətinə edilən zənglərin bəzi hallarda aidiyyəti rayon əvəzinə qonşu rayonun dispetçer xidmətinə yönləndirilməsi ilə bağlı paylaşımlar Respublika Təcili və Təxirəsalınmaz Tibbi Yardım Mərkəzi tərəfindən diqqətə götürülüb.

Məsələ ilə əlaqədar Qazax rayon sakini, bloger Cavanşir Rafiqoğlu narazılığını ifadə edərək bildirib ki, onların yaşadığı ərazidən edilən təcili yardım çağırışları Ağstafa rayonuna düşür, qurumlar isə müraciətə baxmadıqlarını qeyd edərək başqa ödənişli nömrələr verirlər. O, atasının səhhətinin ağır olduğunu və vaxtında tibbi yardım ala bilmədiyini vurğulayıb.

TƏBİB-dən bildirilib ki, oxşar halların aradan qaldırılması və vətəndaşların müraciətlərinə operativ cavab verilməsi üçün regionlardakı dispetçerlərə müvafiq tapşırıqlar verilib. Qaydaya əsasən, zəng başqa rayona daxil olsa belə, dispetçer müraciəti qəbul etməli və dərhal aidiyyəti üzrə yönləndirməlidir.