ARDNF-in aktivlərinin həcmi 74 milyard dollara çatıb

AzadAzərbaycan xəbər verir ki, bu ilin yanvar-sentyabr aylarında Dövlət Neft Fondunun (ARDNF) büdcə gəlirləri 12 milyard 341,3 milyon manat təşkil edib. Bu məbləğin 8 milyard 740,6 milyon manatı neft-qaz gəlirlərinin, 3 milyard 600,7 milyon manatı isə idarəetmə gəlirlərinin payına düşüb. Fondun büdcə xərcləri 9 milyard 681,2 milyon manat olduğu halda, qızıl qiymətlərinin dəyişməsi və məzənnə fərqləri səbəbindən büdcədənkənar xərclər 1 milyard 874 milyon manat təşkil edib.

Doqquz ay ərzində ARDNF mənfəət neft-qazının satışından 7 milyard 343,9 milyon manat, bonus ödənişləri və tranzitdən 0,9 milyon manat, akr hesabı ödənişlərindən runsə 4,9 milyon manat əldə edib. Fondun gəlirlərində "Azəri-Çıraq-Günəşli" yatağının payı 6 milyard 570,6 milyon manat, "Şahdəniz" yatağının payı isə 565,1 milyon manat olub.

Hesabat dövründə qurum dövlət büdcəsinə 9 milyard 628 milyon manat transfert edib. Əlavə olaraq, gənclərin xarici təhsil proqramlarına 21,9 milyon manat, ali təhsilin beynəlxalq rəqabətliliyinin artırılması proqramına 3,6 milyon manat, ikili diplom proqramlarına 2,2 milyon manat və idarəetmə xərclərinə 25,5 milyon manat yönəldilib.

Üçüncü rübdə davam edən geosiyasi gərginliklər və inflyasiya təzyiqləri qlobal maliyyə bazarlarında dalğalanmalara səbəb olsa da, qlobal səhm bazarlarında müsbət gəlirlilik qeydə alınıb. Enerji daşıyıcılarının qiymət artımı əmtəə bazarlarına müsbət təsir göstərsə də, yüksək faiz dərəcələri və borclanma narahatlıqları dövlət istiqrazları bazarlarına təzyiq göstərib.