Vergi borcunu ödəməyən inşaat şirkəti rəhbərinin ölkədən çıxışına qadağa qoyuldu

Azərbaycanda tikinti materiallarının istehsalı sahəsində fəaliyyət göstərən “Paşasoy İnşaat” MMC-nin rəhbərinin ölkədən çıxışına qadağa tətbiq olunub. Buna əsas səbəb cəmiyyətin dövlət qarşısında yaranan maliyyə öhdəliklərini yerinə yetirməməsidir.

İqtisadiyyat Nazirliyi yanında Dövlət Vergi Xidmətinin Bakı Şəhəri Lokal Gəlirlər Baş İdarəsi məhkəməyə müraciət edərək şirkət rəhbərinin ölkədən getmək hüququnun müvəqqəti məhdudlaşdırılmasını tələb edib. Aparılan araşdırmalar zamanı məlum olub ki, qurumun ümumilikdə 5451,54 manat məbləğində borcu mövcuddur.

Məlumata əsasən, yaranan borcun 4640,30 manatı birbaşa dövlət büdcəsinə, qalan hissəsi isə Dövlət Sosial Müdafiə Fonduna, İcbari Tibbi Sığorta Fonduna və İşsizlikdən Sığorta Fonduna ödənilməli olan vəsaitlərdən ibarətdir. Vergi qurumu tərəfindən dəfələrlə xəbərdarlıq edilməsinə baxmayaraq, borc ödənilməyib.

Məhkəmə dövlət qurumunun müraciətini təmin edərək müvafiq qərar qəbul edib. Qərara əsasən, “Paşasoy İnşaat” MMC-nin qanuni təmsilçisi Osman Paşa oğlu Paşayevin ölkədən çıxış hüququ yaranmış borc tam ödənilənə qədər dondurulub.