Yeni Azərbaycan Partiyasında Türkiyənin Zəfər Partiyasının nümayəndəsi ilə görüş keçirilib

AzadAzərbaycan xəbər verir ki, Yeni Azərbaycan Partiyasının (YAP) Mərkəzi Aparatında YAP Sədrinin müavini – Mərkəzi Aparatın rəhbəri Tahir Budaqov ilə Türkiyənin Zəfər Partiyası sədrinin müşaviri Hakkı Şafak Ses arasında görüş keçirilib.

Görüş zamanı Hakkı Şafak Ses partiyanın sədri Ümit Özdağın salamlarını çatdırıb və Azərbaycan ilə əlaqələrin qurulmasında maraqlı olduqlarını qeyd edib. O, Türkiyənin bəzi siyasi dairələri tərəfindən Azərbaycana qarşı aparılan kampaniyanın Zəfər Partiyası tərəfindən narahatlıqla qarşılandığını vurğulayıb.

Tahir Budaqov isə öz növbəsində ölkəmizin haqlı mövqeyinə dəstəyə görə qonağa minnətdarlığını bildirib. O, Azərbaycan-Türkiyə münasibətlərinin ən yüksək zirvədə olduğu bir dövrdə ölkəyə qarşı qərəzli kampaniyaların təşkilinin yolverilməz olduğunu diqqətə çatdırıb.

Tərəflər ikitərəfli münasibətlər və gələcək əməkdaşlıq perspektivləri ətrafında fikir mübadiləsi aparıblar.