İrandan xəbərdarlıq: ABŞ və İsrail hücum edərsə rabitə kabelləri hədəf alınacaq

AzadAzərbaycan xəbər verir ki, ABŞ və ya İsrail tərəfindən İrana qarşı yenidən hücum təşkil olunacağı təqdirdə, Tehran rəsmiləri Fars körfəzində yerləşən sualtı rabitə kabellərini hədəfə götürmək niyyətindədirlər. Bu barədə məlumatı iranlı mənbələr "Röyters" agentliyinə açıqlayıblar.

Bununla belə, mənbələr potensial hücumların konkret ünvanları və hansı üsullarla həyata keçiriləcəyi barədə təfərrüatları hələlik gizli saxlayırlar.

Məlumatda həmçinin vurğulanır ki, İran qüvvələri zərər görən kabellərin bərpa işlərinə də mane olmağa çalışa bilər. Belə bir addım internet xidmətləri başda olmaqla, qlobal rabitə əlaqələrində uzunmüddətli fasilələrin yaranmasına gətirib çıxaracaq.

Rəsmilərdən biri qeyd edib ki, hücumlar baş verəcəyi təqdirdə artıq heç bir "qırmızı xətt" qalmayacaq və cavab tədbirlərinin miqyası əhəmiyyətli dərəcədə genişlənəcək.

Mümkün hədəflər sırasına yalnız sualtı kabellər deyil, eyni zamanda müxtəlif hərbi bazalar və gizli obyektlər də daxil edilə bilər.