Azərbaycanda məktəblərdə tiktoka və zərərli kontentlərə giriş məhdudlaşdırılıb

AzadAzərbaycan xəbər verir ki, ölkə məktəblərində "TikTok" sosial şəbəkəsinə giriş məhdudlaşdırılıb. Bu yenilik təhsil müəssisələrində şagirdlərin təhlükəsizliyini təmin etmək məqsədilə həyata keçirilib.

Elm və təhsil nazirinin müavini Firudin Qurbanov bildirib ki, məhdudiyyətlər təkcə bir platformanı deyil, həmçinin təhsil ocaqlarında 200-dən artıq zərərli kontenti ehtiva edən görüntüləri də əhatə edir.

Təhsil eksperti Elçin Əfəndi qərarın əhəmiyyətini vurğulayaraq qeyd edib ki, bu cür addımlar ötən illərdən başlanılıb və cari ildə qaydalar daha da sərtləşdirilib. Xüsusilə məktəblilərin zorakılıq və qeyri-etik görüntülər yaymasının qarşısının alınması üçün bu tədbirlər zəruridir.

Ekspert əlavə edib ki, dərs zamanı mobil telefonların istifadəsi onsuz da qadağandır və yeni məhdudiyyətlər şagirdlərin enerjisini yalnız təhsilə yönəltməsinə kömək edəcək.