Çexiya Prezidenti: Putin ciddi təcrid olunub və sui-qəsddən qorxur

AzadAzərbaycan xəbər verir ki, Çexiya Prezidenti Petr Pavel Rusiya rəhbəri Vladimir Putinin hazırkı psixoloji vəziyyəti və müharibənin gedişatı ilə bağlı diqqətçəkən fikirlər səsləndirib.

Pavelin sözlərinə görə, cəbhədəki cari durum Rusiya üçün uğurlu nəticədən olduqca uzaqdır. O qeyd edib ki, Moskva kiçik irəliləyişlər əldə etmək naminə külli miqdarda canlı qüvvə itkisi verir.

Çexiya lideri bildirib ki, Rusiya Prezidenti hərbi komandanlığın təqdim etdiyi hesabatlara əsaslanaraq hərbi əməliyyatların müvəffəqiyyətlə davam etdiyinə inanmaqda davam edir. Onun fikrincə, Putin təcrid olunmuş vəziyyətdə yaşayır, ətrafında çox az sayda şəxsə etibar edir və öldürülməkdən patoloji dərəcədə qorxur.

Petr Pavel əlavə edib ki, ətrafında məhdud sayda insanın qalması səbəbindən ona ötürülən bütün məlumatlar həmin şəxslər tərəfindən ciddi şəkildə filtrasiyaya məruz qalır.