Hakan Fidandan Yunanıstana enerji layihəsi ilə bağlı alternativ təklif

Ankara Yunanıstanın Krit adası ilə Kiprin enerji sistemlərini birləşdirməyi nəzərdə tutan sualtı elektrik xəttinin çəkilməsi layihəsinə mənfi yanaşmır. Bu mövzu Türkiyə Prezidenti Rəcəb Tayyib Ərdoğan və Yunanıstanın Baş naziri Kiriakos Mitsotakisin Nyu-Yorkdakı görüşündə müzakirə olunub və rəsmi Ankara təşəbbüsü dəyərləndirib.

Bununla belə, Türkiyənin xarici işlər naziri Hakan Fidan bildirib ki, böyük vəsait sərf edərək uzun sualtı xətt çəkmək əvəzinə, Kiprdən qısa məsafədə yerləşən Türkiyədən elektrik enerjisi əldə etmək daha məqsədəuyğundur. Nazir qeyd edib ki, adanın sakinləri Türkiyədən həm elektrik, həm də şirin su və qaz ala bilərlər.

Eyni zamanda, Hakan Fidan Afinanı bölgədə mövcud status-kvonu dəyişdirmək səylərindən çəkinməyə çağırıb. O, bu cür addımların gələcəkdə daha ciddi problemlərə səbəb ola biləcəyini diqqətə çatdırıb.