Liviyanın ali dini qurumu "Nike" məhsullarına qadağa qoydu

AzadAzərbaycan xəbər verir ki, Liviyanın ən yüksək dini orqanı olan Dar əl-İfta müsəlmanlara "Nike" loqosu olan geyimləri satmağı, almağı və geyinməyi qadağan edən fətva verib.

Qərarın verilməsinə səbəb kimi şirkətin loqosunda qədim yunan bütpərəstliyinə istinad edilməsi göstərilib. Şirkət özü də adın yunan dilindən götürüldüyünü və loqodakı əyri fiqurun yunan qələbə ilahəsinin qanadlarından ilhamlandığını təsdiqləyir.

Fətvada bildirilir ki, bu cür loqotipləri olan geyimləri almaq və geyinmək bütpərəstliklə əlaqəli simvolların yayılmasına bərabərdir və bu, qəbuledilməzdir.

Bundan əlavə, Dar əl-İfta "Nike" şirkətinin İsraili dəstəklədiyini vurğulayaraq, onun simvollarını nümayiş etdirməyin qlobal boykotun pozulması demək olduğunu qeyd edib.

Dini qurum hər bir müsəlmanın borcunun bu markanın məhsullarından istifadə etməkdən çəkinmək olduğunu və bunun inanca sədaqətin göstəricisi olduğunu bəyan edib.