Rusiyanın Balkanlarda və Avropadakı siyasi təsiri zəifləyir

AzadAzərbaycan xəbər verir ki, Rusiya Balkan yarımadasında və Avropanın digər bölgələrində öz geosiyasi mövqelərini sürətlə itirməkdədir. Kremlə yaxın siyasi qüvvələrin Serbiya, Macarıstan və Rumıniyadakı uğursuzluqları Moskvanın qitədəki əvvəlki təsir imkanlarını qoruyub saxlamasını çətinləşdirir. Ekspertlərin fikrincə, bu proseslər Rusiyanın Ukraynadakı hərbi əməliyyatlarına beynəlxalq diplomatik dəstək qazanmaq cəhdlərinə də mənfi təsir göstərir.

Serbiyada gənclər və tələbələrin kütləvi etirazları uzun illər Avropada Moskvayönümlü xətt izləyən prezident Aleksandr Vuçiçin mövqelərinə ciddi zərbə vurub. Yeni formalaşan siyasi mühit Kiyevə birbaşa dəstək verməsə də, Rusiya bölgədəki ən vacib müttəfiqlərindən birini itirmiş sayılır. Eyni zamanda Rumıniyada aylarla davam edən böhrandan sonra Qərb yönümlü hökumət fəaliyyətə başlayıb və Buxarest Ukraynaya logistik, həmçinin energetik dəstəyi artırmağı hədəfləyir.

Macarıstanda isə uzunmüddətli hakimiyyətdən sonra Viktor Orbanın siyasi səhnədən uzaqlaşması Kreml üçün növbəti zərbə olub. Ölkənin yeni rəhbərliyi Moskva ilə münasibətlərə daha tənqidi yanaşaraq Kiyevlə birbaşa dialoqa üstünlük verməyə başlayıb.

Məlumatda həmçinin qeyd olunur ki, Rusiyanın təsir dairəsi yalnız Avropada deyil, Cənubi Qafqazda da daralır. Ermənistan və Azərbaycan arasındakı proseslərə effektiv müdaxilə edə bilməməsi səbəbindən Moskvanın İrəvanla münasibətlərində soyuqluq yaranıb. Çin, İran, Şimali Koreya və Belarus kimi tərəfdaşlar qalsa da, Ukraynadakı müharibə Rusiyanın qlobal güc kimi mövqelərini zəiflətməkdə davam edir.