Xalq artisti Niyaməddin Musayev illər əvvəlki qeyri-adi geyim tərzindən danışıb

AzadAzərbaycan xəbər verir ki, Xalq artisti Niyaməddin Musayev illər əvvəlki qeyri-adi geyim tərzi ilə bağlı maraqlı xatirəsini dilə gətirib. Sənətçi bu barədə televiziya proqramlarının birində danışarkən keçmiş xatirələrini xatırladıb.

O, bildirib ki, vaxtilə platformalı ayaqqabıları və trapez şalvarları dəbə ilk gətirənlərdən biri olub. Qeyri-adi geyimləri ilə hər zaman seçildiyini vurğulayan ifaçı boyunbağı, qolbaq və maraqlı köynəklə toy məclisinə gedərkən aşpazların ona güldüyünü xatırlayıb. Tarzən Əhsən Dadaşovla birlikdə toya gedən sənətçi məclisdə insanların ona təəccüblə baxdığını qeyd edib.

Məclis zamanı toy sahibinin onlara yaxınlaşdığını və musiqi sifariş etdiyini deyən Niyaməddin Musayev maraqlı dialoqu diqqətə çatdırıb. Kişinin onun geyiminə görə səsini bəyənməyəcəyini düşünərək Əhsən Dadaşova müraciət etdiyini, lakin özünün dərhal cavab verdiyini bildirib.

Sənətçi klassik şairlərin qəzəllərinə müraciət etdiyini qeyd edib. Muğam ifası zamanı birbaşa qəzəllə oxumağa başladığını deyən ifaçı, məclisin sonunda həmin şəxsin gəlib ondan Üzr istədiyini və səsini çox bəyəndiyini etiraf edib.