Türkiyə liderinin Azərbaycana telefon zəngi strateji əhəmiyyət daşıyır

AzadAzərbaycan xəbər verir ki, Türkiyə Prezidenti Rəcəb Tayyib Ərdoğanın Azərbaycan Prezidenti İlham Əliyevə şəxsən telefon zəngi etməsi iki qardaş dövlətin münasibətləri, regional həmrəyliyi və Türk dünyasının gələcəyi baxımından son dərəcə mühüm strateji liderlik addımıdır. Türkiyənin ölkəmizdəki keçmiş hərbi attaşesi general-mayor Yücel Karauz bu təmasın iki ölkə arasındakı qardaşlığın gündəlik siyasi müzakirələrdən və fikir ayrılıqlarından qat-qat üstün olduğunu bir daha nümayiş etdirdiyini bildirib.

General qeyd edib ki, dövlət başçılarının söhbəti zamanı üç əsas məqam ön plana çıxıb. Belə ki, Türkiyə lideri Azərbaycanın dövlət müstəqilliyini bərpa etməsinin 35-ci ildönümünü təbrik edib, ikitərəfli əməkdaşlığın bütün sahələrdə daha yüksək səviyyəyə çatdırılacağını vurğulayıb və Prezident İlham Əliyevi Ankarada keçiriləcək Türk Dövlətləri Təşkilatının XIII Zirvə Görüşünə dəvət edib. Bu mesajlar telefon danışığının sadəcə diplomatik nəzakət deyil, həm də güclü strateji iradə bəyanatı olduğunu göstərir.

Karauz vurğulayıb ki, son dövrlərdə hər iki ölkənin ictimai mühitində ortaya çıxan bəzi müzakirələrin münasibətlərə kölgə salmaq cəhdlərinə qarşı liderlərin birbaşa təmas qurması çox vacibdir. Bu addım fikir ayrılıqlarının dövlətlər arasındakı qardaşlığın önünə keçməməli olduğunu bir daha sübut edib. Eyni zamanda, Azərbaycanın suverenliyinə və milli nailiyyətlərinə verilən dəyər Türkiyənin dəstəyinin növbəti təsdiqidir.

Ekspert əlavə edib ki, Ankara Zirvə Görüşünə edilən dəvət ikitərəfli qardaşlığı Türk dünyasının ortaq gələcəyinə daşıyır. Türkiyə ilə Azərbaycanın birgə hərəkət etməsi Orta Dəhlizin gücləndirilməsi, enerji təhlükəsizliyi və müdafiə sənayesi sahəsində inteqrasiya baxımından müstəsna əhəmiyyət daşıyır. Bu sarsılmaz birlik dostlara güvən, əməkdaşlığın zəifləməsindən mənfəət umanlara isə hər zaman cavab verir.