Vətən müharibəsi qazisi Vüsal Həsənov Şuşa və Füzuli əməliyyatlarının təfərrüatlarını açıqlayıb

AzadAzərbaycan xəbər verir ki, Vətən müharibəsi qazisi, Daxili İşlər Nazirliyinin Daxili Qoşunlarının Xüsusi Təyinatlı Dəstəsinin qərargah rəisi, kapitan Vüsal Həsənov xidmət yolu və döyüş təcrübəsi haqqında danışıb. 2007-ci ildən xidmətə başlayan zabit Türkiyədə komando, paraşüt və yaxın döyüş üzrə xüsusi kurslar keçərək 16 il ərzində Daxili Qoşunların xüsusi təyinatlı strukturunda fəaliyyət göstərib. Döyüş tapşırıqlarını uğurla icra etdiyinə görə o, vaxtından əvvəl kapitan rütbəsinə layiq görülüb.

Zabit bildirib ki, 2020-ci il sentyabrın 27-də başlayan əks-hücum əməliyyatları zamanı onun döyüş yolu Füzuli istiqamətindən başlayıb. Strateji əhəmiyyət kəsb edən 525 nömrəli təpənin azad olunması əməliyyatını Daxili Qoşunların xüsusi təyinatlıları planlaşdırıb. Həmin yüksəkliyin ələ keçirilməsi nəticəsində 30 ildən sonra Əhmədbəyli–Füzuli yolu yenidən istifadəyə verilib və ordunun təminat xətti qısaldılıb. Əməliyyat zamanı şəhid verilməyib, yalnız iki hərbçi yaralanıb.

Vüsal Həsənov Şuşa əməliyyatının mürəkkəbliyindən də söz açıb. Onun sözlərinə görə, hərbçilər Xocavənd istiqamətindən düşmənin 60 kilometr dərinliyinə irəliləyərək Xocalının Çanaqçı və Sığnaq kəndlərindən keçməklə Daşaltı ərazisindəki 1553 və 1554 nömrəli yüksəklikləri azad ediblər. Ərazinin çətin dağlıq relyefinə və qarşı tərəfin əlverişli mövqelərinə baxmayaraq, Azərbaycan Ordusu düşmənin xüsusi təyinatlı qüvvələrinə ağır itkilər etdirərək geri çəkilməyə məcbur edib.

Qazi həmçinin vurğulayıb ki, İkinci Qarabağ müharibəsində Daxili İşlər Nazirliyinin Daxili Qoşunlarının xüsusi təyinatlı dəstələrindən 66 nəfər şəhid olub, 346 nəfər yaralanıb. Çətin döyüş şəraitinə baxmayaraq, peşəkar təlim görmüş hərbçilərin yüksək döyüş ruhu və Vətən sevgisi qələbənin qazanılmasında həlledici rol oynayıb.