Çində süni intellekt bazarındakı maliyyə köpüyü partlayıb

AzadAzərbaycan xəbər verir ki, Çində süni intellekt istiqamətində formalaşan maliyyə köpüyü artıq sıradan çıxıb. Sinir şəbəkələri və yarımkeçiricilər bazarının əsas oyunçularını özündə birləşdirən STAR50 indeksinin səhmləri son dörd ay ərzində 40 faiz dəyər itirib. Nəticədə bu sahənin ümumi dəyəri 480 milyard dollar azalıb.

Bazarın geriləməsinin əsas səbəbi süni intellektlə bağlı şirkətlərin həddindən artıq şişirdilmiş qiymətləridir. Goldman Sachs-ın məlumatına görə, belə müəssisələr Çin səhmlərinin ümumi bazar kapitallaşmasının təxminən 42 faizini təmin edirdi. Özəl investorların fəallığı bir müddət kotirovkaların artmasına şərait yaratdı, lakin sonradan bazara güclü təzyiq göstərməyə başladı.

Tənəzzül xüsusilə robot və çip istehsalçısı olan şirkətlərə ağır zərbə vurub. Humanoid robotlar istehsal edən Unitree şirkətinin qiymətli kağızları ticarətə başlayandan bəri dəyərinin təxminən yarısını itirib. Eyni zamanda, digər texnologiya nəhəngləri də oxşar aqibətlə qarşılaşıb və səhmləri iki dəfə ucuzlaşıb.

Mütəxəssislər qeyd edirlər ki, süni intellekt sektorundakı şirkətlər yaxın gələcəkdə ciddi qiymət müharibəsi ilə üzləşəcəklər. Baş verənlər Pekinin sabit fond bazarını inkişaf etdirmək və yüksək texnologiyalara investisiya cəlb etmək planlarına mənfi təsir göstərib.

Son araşdırmalar da göstərir ki, süni intellektə vəsait xərcləyən müəssisələrin əksəriyyəti qoyulan investisiyalardan gözlənilən iqtisadi faydanı əldə edə bilməyib. Bir çox şirkət avtomatlaşdırmanın hələ ki insan əməyini tam əvəz edə bilmədiyi qənaətinə gələrək əvvəllər işdən çıxardığı əməkdaşları yenidən işə qaytarmağa başlayıb.