Dövlət Sosial Müdafiə Fondu əmək pensiyalarının bərpası qaydalarını açıqlayıb
AzadAzərbaycanRedaksiyaDövlət Sosial Müdafiə Fondu əvvəllər təyin edilmiş əmək pensiyalarının bərpa olunması və yenidən təyin edilməsi qaydalarına aydınlıq gətirib.
AzadAzərbaycan xəbər verir ki, Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu əvvəllər təyin edilmiş əmək pensiyasının bərpa olunması və yenidən təyin edilməsi qaydaları ilə bağlı məlumat yayıb.
Bildirilib ki, ümumi xəstəlik nəticəsində əlilliyə görə verilən pensiyaların ödənişi müddət bitdiyinə görə dayandırılıbsa, beş ildən çox vaxt keçməyibsə həmin pensiyalar bərpa edilir. Əgər beş ildən artıq müddət keçibsə və yenidən əlillik yaranarsa, əmək pensiyası ümumi əsaslarla yenidən təyin olunur.
Qurumdan qeyd olunub ki, əlilliyə görə əvvəllər təyin edilmiş pensiyanın digər səbəblərdən bərpası hər hansı müddət məhdudiyyəti ilə üzləşmir.
Həmçinin vurğulanıb ki, bu xidmət elektron qaydada həyata keçirilir. Əgər bu mümkün olmasa, vətəndaşlar və ya onların nümayəndələri lazımi sənədlərlə birlikdə DSMF-nin struktur bölmələrinə, yaxud DOST mərkəzlərinə şəxsən müraciət edə bilərlər.
