Azərbaycanın Uzunmüddətli Aşağıkarbonlu İnkişaf Strategiyası təsdiqləndi

Azərbaycan Respublikasının Nazirlər Kabineti tərəfindən "Azərbaycanın Uzunmüddətli Aşağıkarbonlu İnkişaf Strategiyası" rəsmi olaraq təsdiqlənib. Müvafiq qərarı Baş nazir Əli Əsədov imzalayıb.

Sənəddə əksini tapan "xalis sıfır emissiya" məqsədinə çatmaq üçün İqtisadiyyat Nazirliyinə iqtisadiyyatın müxtəlif sahələrində dekarbonlaşma addımlarını dövlət proqramlarına, milli fəaliyyət planlarına və digər strateji sənədlərə inteqrasiya etmək tapşırılıb. Bu tədbirlərin maliyyələşdirilməsini isə Maliyyə Nazirliyi təmin edəcək.

Qeyd olunur ki, 2060-cı ilə qədər qarşıya qoyulan şərtli "xalis sıfır emissiya" hədəfinə nail olunması əlavə maliyyə vəsaitlərinin cəlb edilməsi, texnologiyaların transferi, beynəlxalq əməkdaşlıq, güzəştli kreditlər və özəl sektor investisiyalarından bilavasitə asılı olacaq.

Qərara əsasən, Ekologiya və Təbii Sərvətlər Nazirliyi hazırlanmış strategiyanı BMT-nin İqlim Dəyişmələri üzrə Çərçivə Konvensiyasının Katibliyinə göndərəcək. Eyni zamanda, nazirlik prosesin icrasına monitorinq edərək nəticələri hər iki ildən bir İqlim Dəyişmələri üzrə Dövlət Komissiyasına təqdim etməli və ictimaiyyətin məlumatlandırılmasını təmin etməlidir.