Fransada kütləvi etirazlar səbəbindən PSJ və Lion matçı təxirə salındı

Fransada davam edən kütləvi etirazlar səbəbindən ölkə çempionatının növbəti futbol matçı təxirə salınıb. Söhbət PSJ və "Lion" klublarının qarşıdurmasından gedir.

Bu barədə ölkənin 1-ci Liqasının rəsmi internet səhifəsində məlumat yayılıb. Bildirilib ki, əslində oktyabrın 25-i bazar günü Parisdə baş tutmalı olan görüş bazar ertəsinə ertələnib və Bakı vaxtı ilə saat 23:30-da start götürəcək.

Fransa Futbol Federasiyasının bu qərarı paytaxt prefekturasının ölkəni bürüyən etirazlar fonunda oyunun həftəsonu keçirilməsinə qadağa qoymasından sonra qəbul olunub.

Qeyd edək ki, aksiya iştirakçıları yanacağın qiymətinin bahalaşmasına və əhalinin alıcılıq qabiliyyətinin aşağı düşməsinə etiraz edirlər. Ötən həftəsonu Fransanın müxtəlif regionlarında baş tutan nümayişlər bəzi şəhərlərdə polislə toqquşmalara və kütləvi iğtişaşlara səbəb olub.