Göz sağlamlığına ciddi zərər vuran üç təhlükəli gündəlik vərdiş

Gündəlik həyatda təhlükəsiz görünən bəzi vərdişlər göz sağlamlığına ağır zərbə vura və görmə qabiliyyətinin tamamilə itirilməsinə yol aça bilər.

Oftalmoloq Aleksandra Struqova bu təhlükələr barədə xəbərdarlıq edərək, xüsusilə kontakt linzalarla yuxuya getməyin risklərinə diqqət çəkib. Həkimin sözlərinə görə, bu vərdiş buynuz qişada xora yaranması ehtimalını beş-on dəfə artırır və gözlərdə ciddi oksigen çatışmazlığına səbəb olur.

Digər zərərli vərdiş isə gözləri çirkli əllərlə ovuşdurmaqdır. Barmaqlarda olan bakteriyalar və toz hissəcikləri müxtəlif infeksiyalara yol açır. Mütəxəssislər qaşınma zamanı gözləri sərin su ilə yumağı və ya süni göz yaşından istifadə etməyi məsləhət görürlər.

Siyahıdakı üçüncü təhlükə isə istifadə müddəti bitmiş kosmetik vasitələrdən və göz damcılarından yararlanmaqdır. Açıldıqdan sonra 28 gün keçən damcı flakonları bakteriyaların çoxalması üçün əlverişli mühitə çevrilir.