Hakimlərin Etik Davranış Kodeksi yenilənərək Dövlət Reyestrinə daxil edilib

AzadAzərbaycan xəbər verir ki, Məhkəmə-Hüquq Şurası tərəfindən dövrün tələblərinə uyğun olaraq yenidən işlənib hazırlanan "Hakimlərin Etik Davranış Kodeksi" rəsmi şəkildə Azərbaycan Hüquqi Aktların Dövlət Reyestrinə əlavə edilib.

Yenilənmiş sənəd hakimlərin iş fəaliyyətində və gündəlik həyatdakı davranışlarını, onların peşə etikasına riayət etmə qaydalarını və mənəvi-əxlaqi öhdəliklərini tənzimləyir. Kodeksin əsas qayəsi məhkəmə hakimiyyətinin cəmiyyətdəki nüfuzunu artırmaq, vətəndaşların ədalət mühakiməsinə inamını gücləndirmək və hakimlərin yüksək etik standartlara uyğun fəaliyyət göstərməsini təmin etməkdən ibarətdir.

Yeni Kodeksdə hakimlərin müstəqilliyi, obyektivliyi, dürüstlüyü, media və sosial şəbəkələrdən istifadə qaydaları, habelə icra intizamı kimi vacib prinsiplər tənzimlənir. Sənədə əsasən, etik norma və qaydalarla bağlı maarifləndirmə aparmaq və müvafiq məsələləri tənzimləmək üçün Etika Komissiyası fəaliyyət göstərəcək.

Xatırladaq ki, yeni redaksiyanın qüvvəyə minməsi ilə Məhkəmə-Hüquq Şurasının 2007-ci il 22 iyun tarixli qərarı ilə qəbul olunmuş əvvəlki kodeks öz hüquqi qüvvəsini itirib.