Azərbaycanın tarixi dövlətçilik ənənəsi və müasir interkulturalizm modeli

Azərbaycanın ev sahibliyi etdiyi VII Ümumdünya Mədəniyyətlərarası Dialoq Forumu ölkəmizin qlobal sülh və dialoq mərkəzi kimi nüfuzunu növbəti dəfə təsdiqlədi. Prezident İlham Əliyevin Forumun açılışındakı çıxışı milli dövlətçilik təfəkkürünün təməlini təşkil edən Azərbaycançılıq məfkurəsinin tarixi və müasir fəlsəfəsini geniş şəkildə ortaya qoydu. Ölkəmizin təşəbbüsü olan "Bakı Prosesi" əsrlər boyu formalaşmış etno-mədəni harmoniya və dövlətçilik ənənələrinə söykənir.

Tarixən müxtəlif xalqların və konfessiyaların birgə dinc yaşadığı Azərbaycan torpaqlarında bərqərar olan multikulturalizm təsadüfi xarakter daşımır. Qafqaz Albaniyası dövründən başlayan çoxmədəniyyətli mühit günümüzdə də uğurla qorunur. Müasir Azərbaycanda bütün etnik qruplar və dini icmalar bərabərhüquqlu ailənin üzvləri kimi yaşayırlar. Vətən Müharibəsi zamanı bütün icmaların nümayəndələrinin çiyin-çiyinə vuruşması bu milli birliyin praktiki sübutu oldu.

Zəngin dövlətçilik tarixi boyunca Şirvanşahlar, Ağqoyunlular, Səfəvilər və Əfşarlar kimi qüdrətli imperatorluqlar və sülalələr diplomatik, mədəni və hərbi sahədə böyük irs qoyublar. Ağqoyunlu hökmdarı Uzun Həsənin Avropa dövlətləri ilə qurduğu diplomatik əlaqələr, Şah İsmayıl Xətainin mərkəzləşdirilmiş dövlət yaratması və Nadir Şahın məzhəblərarası dialoq cəhdləri müasir Azərbaycanın beynəlxalq münasibətlər sistemindəki roluna tarixi zəmin yaradıb.

Xanlıqlar dövründə yaşanan feodal pərakəndəliyi milli birliyin vacibliyini acı dərslərlə göstərsə də, müasir Azərbaycan dövləti keçmişin təcrübəsindən nəticə çıxararaq sarsılmaz həmrəylik nümayiş etdirir. Bu gün Azərbaycan özünün zəngin tarixi irsini, şəhərsalma mədəniyyətini və diplomatik ənənələrini sintez edərək regionun lider dövlətinə çevrilib və bəşəriyyətə sülh, dialoq modelini təqdim edir.