Rəcəb Tayyib Ərdoğan İlham Əliyevi Zəfər Günü münasibətilə təbrik edib

AzadAzərbaycan xəbər verir ki, Türkiyə dövlət başçısı Rəcəb Tayyib Ərdoğan Azərbaycan Prezidenti İlham Əliyevə Zəfər Günü münasibətilə təbrik məktubu yollayıb. Məktubda otuz illik işğaldan sonra azad olunan torpaqların tarixi zəfəri münasibətilə bütün Azərbaycan xalqına səmimi təbriklər çatdırılır.

Ərdoğan qeyd edib ki, Azərbaycanın qazandığı bu ədalətli qələbə bütün Türk dünyası üçün böyük qürur mənbəyidir. İşğaldan azad edilmiş ərazilərdə aparılan bərpa və quruculuq işlərinin sürətlə davam etməsi də qardaş ölkədə dərin məmnunluq hissi doğurur.

Türkiyə lideri Şuşa Bəyannaməsi ilə müttəfiqlik səviyyəsinə yüksələn "Bir millət, iki dövlət" prinsipinin iki ölkə arasındakı dostluq və qardaşlığı daha da möhkəmləndirdiyini vurğulayıb. O, ikitərəfli və beynəlxalq platformalarda sıx əməkdaşlığın bundan sonra da davam edəcəyinə əminliyini bildirib.

Bununla yanaşı, regionda davamlı sülh və sabitliyin bərqərar olunması istiqamətində birgə addımların Cənubi Qafqazı münaqişə zonasından inkişaf və əməkdaşlıq məkanına çevirdiyi diqqətə çatdırılıb.

Məktubun sonunda Türkiyə Prezidenti Vətən uğrunda canından keçmiş şəhidlərə rəhmət, qazilərə minnətdarlıq ifadə edərək, dövlət başçısına və qardaş Azərbaycan xalqına cansağlığı və sülh arzulayıb.