Xəzərdə güclü fırtına gözlənilir: Gəmilərə rəsmi xəbərdarlıq olundu

AzadAzərbaycan xəbər verir ki, Dövlət Dəniz və Liman Agentliyinin Gəmi Hərəkətinin İdarəedilməsi Mərkəzi tərəfindən küləkli hava şəraiti ilə əlaqədar dənizdəki gəmilərə rəsmi xəbərdarlıq edilib.

Açıqlanan məlumata əsasən, noyabrın 8-dən başlayaraq Xəzər dənizi akvatoriyasında şimal-qərb və şimal küləyinin şiddətlənəcəyi və bu hava şəraitinin noyabrın 9-dək davam edəcəyi gözlənilir.

Küləyin sürətinin saniyədə 18-23 metrə, bəzi vaxtlarda 25-30 metrə, açıq dəniz ərazilərində isə hətta 32 metrədək artacağı ehtimal olunur. Eyni zamanda dənizdə dalğaların hündürlüyünün öncə 2.5-3.5 metrə, sonrakı saatlarda isə 4-6 metrə qədər qalxacağı proqnozlaşdırılır.