ABŞ-da hərbi texnikanı göydən qorumaq üçün uçan maskalanma sistemi hazırlanıb

AzadAzərbaycan xəbər verir ki, Amerikanın “Vigil Autonomy” şirkəti hərbi texnikanı və piyadaları kəşfiyyat dronları ilə peyklərdən qorumaq üçün nəzərdə tutulmuş qeyri-adi “Air Cover” maskalanma sistemini nümayiş etdirib. Yeni texnologiya dörd dron vasitəsilə qorunan obyektin üzərində saxlanılan xüsusi örtükdən ibarətdir.

Sistemin əsas məqsədi hərbi texnikanı təkcə adi optik vasitələrdən deyil, həm də infraqırmızı və radar diapazonlarından, xüsusən də termal görüntülərdən gizlətməkdir. Ənənəvi üsullardan fərqli olaraq, bu qurğu həm stasionar, həm də hərəkətdə olan obyektlərin üzərində tətbiq oluna bilir.

Lakin mütəxəssislər bu yeniliyin bəzi çatışmazlıqlarına da diqqət çəkirlər. Məsələn, sistemin işləmə müddəti təxminən iki saat təşkil edir və o, obyekti yalnız yuxarıdan qoruyur. Batareyalar bitdikdən sonra qurğunun daşınması əlavə çətinliklər yarada bilər.

Bəzi analitiklər bu konsepsiyanın döyüş meydanında hələlik tam praktiki və səmərəli olmadığını düşünürlər. Buna baxmayaraq, bəzi xüsusi şəraitlərdə sistemin hava kəşfiyyatına qarşı əlavə müdafiə təmin edə biləcəyi istisna olunmur.