Azərbaycan və Bolqarıstan XİN başçıları arasında siyasi məsləhətləşmələr baş tutub

Azərbaycan Respublikası xarici işlər nazirinin müavini Elnur Məmmədov noyabrın 5-6-da Bolqarıstanda rəsmi səfərdə olub.

AzadAzərbaycan xəbər verir ki, səfər çərçivəsində Sofiyada iki ölkənin Xarici İşlər Nazirlikləri arasında siyasi məsləhətləşmələrin sayca altıncı raundu reallaşıb. Nümayəndə heyətlərinə Azərbaycan tərəfindən nazir müavini Elnur Məmmədov, Bolqarıstan tərəfindən isə xarici işlər nazirinin müavini İvanka Taşeva rəhbərlik ediblər.

Görüşdə tərəflər strateji tərəfdaşlıq əlaqələrinin cari vəziyyətini və inkişaf istiqamətlərini nəzərdən keçiriblər. Xüsusilə iqtisadiyyat, energetika, yaşıl enerji dəhlizləri, eləcə də nəqliyyat-logistika sahələrində əməkdaşlığın genişləndirilməsi imkanları müzakirə edilib.

Danışıqlar zamanı ticarət dövriyyəsinin şaxələndirilməsi, qarşılıqlı sərmayələrin təşviqi və beynəlxalq təşkilatlar çərçivəsində koordinasiyanın davam etdirilməsinin vacibliyi diqqətə çatdırılıb. Eyni zamanda humanitar, mədəni, elm və təhsil sahələrində əlaqələrin gücləndirilməsi diqqət mərkəzində olub.

Səfər çərçivəsində Elnur Məmmədov Bolqarıstanın xarici işlər naziri Velislava Petrova-Çamova, Baş nazirin xarici siyasət üzrə müşaviri Rusi İvanov və parlamentin nümayəndələri ilə də görüşlər keçirib. Nazir müavini həmçinin Bolqarıstan XİN-in Diplomatik İnstitutunun dinləyiciləri və Sofiya Universitetinin tələbələri qarşısında mühazirə ilə çıxış edib.