Azərbaycana qarşı ideoloji manipulyasiya cəhdləri və milli həmrəyliyin önəmi

Ölkəmizin təhlükəsizliyi, sabitliyi və vətəndaşların gələcəyə inamla baxmasının təməlində milli birlik və həmrəylik mühiti dayanır. Bütün dövrlərdə həyata keçirilən təxribat xarakterli ideoloji manipulyasiyaların əsas məqsədi məhz bu daxili birliyi və sabitliyi sarsıtmaq olub.

Müasir texnologiyaların və sosial şəbəkələrin təsiri ilə bəsit ünsiyyət formalarının öyrədilməsi, dərin təhlil və nəzəriyyələrdən uzaqlaşma meyilləri cəmiyyətin ideoloji dəyərlərinə mənfi təsir göstərir. Bu vəziyyət rasional düşüncəni sıxışdıran emosional manipulyasiyalara münbit şərait yaradır.

Müstəqillik qazanıldığı vaxtdan etibarən strateji coğrafiyada və zəngin resurslara malik olan Azərbaycan geosiyasi mübarizələrin mərkəzində yer alıb. Ərazilərimizin işğaldan azad edilməsi və qazanılan böyük Zəfər belə xarici təzyiqlərin və ideoloji hücumların yeni dalğasını tətikləyib.

Fərqli istiqamətlərdən yönələn təxribatlar cəmiyyətdə natamamlıq kompleksi yaratmağa, dini və mənəvi dəyərlərlə manipulyasiya etməyə hesablanıb. Lakin bütün bu təsir cəhdlərinə qarşı Azərbaycan cəmiyyətində güclü ideoloji immunitet formalaşıb və milli həmrəylik sarsılmaz olaraq qalır.