Çin iqtisadiyyatının xarici uğurlarının arxasında gizlənən ciddi problemlər

AzadAzərbaycan xəbər verir ki, Çin avtomobil, mikroçip və sənaye məhsullarının xarici bazarlara ixracını artırır, lakin bu görünən uğurun arxasında ciddi iqtisadi problemlər yığılır. Zərərlə fəaliyyət göstərən Çin sənaye müəssisələrinin payı son illərdə əhəmiyyətli dərəcədə artaraq yüksək həddə çatıb.

Hökumət iş yerlərini qorumaq və iqtisadi planları icra etmək məqsədilə zərərli şirkətlərə dəstək olmağa davam edir. Lakin bu siyasət ölkənin borc yükünü artırır və iqtisadiyyatı dövlət yardımından birbaşa asılı vəziyyətə salır. Böhranın əsas səbəblərindən biri kimi həddindən artıq istehsal göstərilir.

Yerli istehlakçıların tələbatından artıq məhsul istehsal edən fabriklər müştərilər uğrunda mübarizədə qiymətləri aşağı salmağa məcbur qalırlar ki, bu da onların mənfəətini azaldır. Səmərəsiz şirkətlərin müflisləşməsinə imkan vermək əvəzinə, dövlət tərəfindən onlara subsidiyalar və yeni kreditlər ayrılır.

Ekspertlərin fikrincə, Çinin qeyri-maliyyə sektorunun ümumi borcu artıq ÜDM-in 300 faizini keçib, daxili tələbat isə zəif olaraq qalır. İstehsalçılar yaranmış vəziyyətdən çıxış yolunu ixracı artırmaqda görürlər, lakin xarici bazarlardakı yeni ticarət məhdudiyyətləri və tariflər bu strategiyanı daha da çətinləşdirir.