DİN-dən Bakı, Gəncə və Sumqayıtda narkotikə qarşı irimiqyaslı əməliyyat

Azərbaycan Respublikasının Daxili İşlər Nazirliyinin Baş Narkotiklərlə Mübarizə İdarəsi tərəfindən narkotik vasitələrin qanunsuz dövriyyəsinin qarşısının alınması istiqamətində növbəti uğurlu əməliyyat tədbirləri həyata keçirilib.

Paytaxt Bakı şəhəri ilə yanaşı, Gəncə və Sumqayıt şəhərlərində də reallaşdırılan tədbirlər nəticəsində qanunsuz olaraq narkotik vasitə alveri ilə məşğul olan Orxan Quliyev, Məhərrəm Seyidov, Mircəfər Abuşov, İsmayıl Məmmədov, Muraz Məmmədov, Mirzə Mənafov və Elvin Əliyev saxlanılıblar.

Keçirilən axtarışlar zamanı həmin şəxslərdən ümumilikdə 82 kiloqram müxtəlif növ narkotik vasitə və 6365 ədəd narkotik tərkibli həb aşkar olunaraq götürülüb. Aparılan ilkin araşdırmalarla məlum olub ki, saxlanılan şəxslər xarici ölkələrdə məskunlaşan narkotacirlərin tapşırıqlarını yerinə yetirərək, qaçaqmalçılıq yolu ilə ölkə ərazisinə gətirilən qadağan olunmuş maddələrin realizasiyasını təşkil ediblər.

Faktlarla bağlı müvafiq cinayət işləri başlanılıb və məhkəmənin qərarı ilə saxlanılan şəxslərin hər biri barəsində həbs qətimkan tədbiri seçilib. İstintaq tədbirləri davam etdirilir.