Koronavirusun yeni mutasiya variantları yayılır: Azərbaycana təhlükə varmı

AzadAzərbaycan xəbər verir ki, koronavirusun yeni mutasiya variantları yayılmaqda davam edir və qonşu İranda da yoluxma sayında artım qeydə alınıb. Artıq həmin ölkədə ölüm halları da baş verib. Mütəxəssislərin sözlərinə görə, yayılan yeni alt ştam əvvəlki variantlarla müqayisədə daha sürətli yoluxma qabiliyyətinə malikdir.

Səhiyyə eksperti, tibb üzrə elmlər doktoru Adil Qeybulla bildirib ki, koronavirus pandemiyası arxada qalsa da, onun epidemiyası hələ də qalmaqdadır. Bu prosesin bir müddət daha davam edəcəyi gözlənilir. Həkim-terapevt Gülnar Quliyeva isə qeyd edib ki, virusun xüsusiyyətləri hər kəsə tanış olsa da, təhlükə və risk hər zaman mövcuddur.

Mütəxəssislərin fikrincə, omikron ştamının müxtəlif mutasiyaları yayılmağa davam edir və bu prosesin nə vaxt başa çatacağını, yoxsa adi qrip kimi hər il təkrarlanacağını dəqiq demək çətindir. Hava-damcı yolu ilə yoluxan bu infeksiyanın istənilən ölkəyə daxil olmaq ehtimalı həmişə var. Xüsusilə qonşu dövlətlərdə yoluxmaların artması fonunda epidemioloji vəziyyətin nəzarətdə saxlanılması vacibdir.