Moskva vilayətində meymunçiçəyi xəstəliyinə yeni yoluxma faktı təsdiqlənib

AzadAzərbaycan xəbər verir ki, Moskva vilayətində meymunçiçəyinə növbəti yoluxma halı aşkar edilib. Təsdiqlənmiş diaqnozla 38 yaşlı kişi Domodedovo Mərkəzi Xəstəxanasında müalicəyə cəlb olunub.

Tibb müəssisəsindən verilən məlumata əsasən, bu, son bir ayda xəstəxanada qeydə alınan 3-cü, son iki il ərzində isə 8-ci analoji haldır. Qızdırma, dəri səpkiləri və limfa düyünlərinin böyüməsi simptomları ilə daxil olan pasiyentin vəziyyəti hazırda qənaətbəxş qiymətləndirilir. Mütəxəssislər infeksiya mənbəyini və xəstə ilə kontaktda olanları müəyyənləşdirmək üçün epidemioloji təhqiqat aparırlar.

Xatırladaq ki, oktyabrın 8-də həmin xəstəxanada meymunçiçəyi müalicəsi alan 27 yaşlı pasiyent tam sağalaraq evə buraxılmışdı. Ölkə xaricinə çıxmadığını deyən həmin şəxsin virusa harada yoluxduğu bilinmir. Bundan əlavə, oktyabrın 15-də xəstə ilə təmasda olan 5 nəfər nəzarətə götürülsə də, onların heç birində infeksiya aşkar edilməmişdi.