Paket çaylarda mikroplastik təhlükəsi: Tək fincana minlərlə hissəcik sızır

AzadAzərbaycan xəbər verir ki, "Daily Mail" nəşrində yayımlanan tədqiqat nəticələri plastik paket çayların isti su ilə təmasda olduğu zaman böyük miqdarda zərərli maddələr ayırdığını üzə çıxarıb. Mütəxəssislərin qənaətinə görə, tək bir fincan çaya 2500-ə qədər mikroplastik hissəciyi və orqanizm üçün təhlükəli olan Bisfenol A (BPA) maddəsi keçir.

Aşkar edilmiş mikroplastiklərin bir çox filtr istehsalında tətbiq olunan poliamid plastik növlərindən ibarət olduğu məlum olub. Sınaqlar zamanı 100 mikrometrdən böyük hissəciklər nəzərə alınıb, bundan da kiçik ölçülü nano-hissəciklər isə ümumi sayıma daxil edilməyib.

Açıq satılan quru çaylar üzərində aparılan analizlər onların dəfələrlə təhlükəsiz olduğunu göstərib. Açıq çayın bir kiloqramında 146 ilə 1178 arasında mikroplastik tapılıb ki, bu da 2 qramlıq bir dəfəlik porsiyada cəmi 0,3 - 2,4 hissəcik deməkdir. Bu göstərici paket çaylarla müqayisədə min dəfə azdır.

Bundan əlavə, tədqiq edilən bütün plastik çay paketlərində mikroplastiklərlə yanaşı, BPA və fitalat esterləri də müəyyən edilib. Tək bir fincan paket çaydan qəbul edilən BPA-nın miqdarı Avropa Qida Təhlükəsizliyi Qurumunun (EFSA) müəyyən etdiyi gündəlik normanın 4,55% - 21,70%-nə çatır. Bu maddənin digər qida məhsullarından da orqanizmə daxil olduğunu vurğulayan mütəxəssislər, xüsusən uşaqlar və hamilə qadınlar üçün böyük risk yarandığına diqqət çəkirlər.

Mütəxəssislər təhlükədən qorunmaq üçün paket çaylar əvəzinə açıq quru çaylardan istifadə etməyi, dəmləmə prosesində metal və ya keramik süzgəclərə üstünlük verməyi tövsiyə edirlər. Həmçinin, isti mühitdə milyonlarla mikro və nanoplastik yayan birdəfəlik plastik stəkanlardan imtina edilməsi vacib sayılır.