Azərbaycan Dövlət Film Fondunda Yavər Rzayevin 70 illik yubileyi qeyd olunub

Azərbaycan Dövlət Film Fondunda tanınmış kinorejissor və ssenarist, Əməkdar incəsənət xadimi Yavər Rzayevin 70 illik yubileyi təntənəli şəkildə qeyd olunub.

AzadAzərbaycan xəbər verir ki, tədbirdə çıxış edən Azərbaycan Dövlət Film Fondunun direktoru, Əməkdar incəsənət xadimi Cəmil Quliyev yubilyarın həyat yolundan və sənət fəaliyyətindən bəhs edərək, onun bədii və sənədli ekran əsərlərini təhlil edib.

Daha sonra Xalq artisti Siyavuş Kərimi, Əməkdar incəsənət xadimləri Elxan Cəfərov, Rövşən Quliyev, Əməkdar mədəniyyət işçisi İlqar Fəhmi və sənətşünaslıq doktoru Hatəm Əsgərov çıxış edərək kinorejissora təbriklərini çatdırıb və gələcək yaradıcılıq işlərində uğurlar arzulayıblar.

Mədəniyyət Nazirliyi, Azərbaycan Dövlət Film Fondu və Azərbaycan Kinematoqrafçılar İttifaqının birgə təşkilatçılığı ilə baş tutan gecənin sonunda rejissorun 2020-ci ildə “Azərbaycanfilm” kinostudiyasında çəkdiyi “Bizim Həsən müəllim” filmi nümayiş etdirilib.