BMW könüllü işdən çıxacaq əməkdaşlara yüksək ödənişlər təklif edir

Almaniyanın tanınmış avtomobil istehsalçısı BMW fərdi işçilərə könüllü olaraq işdən çıxarılma müqabilində 650 min avroya, yəni təxminən 730 min dollara qədər vəsait təklif edir. Bu barədə məxfi müqavilə nümunələrinə istinadən məlumat yayılıb.

Şirkət rəsmiləri məbləğlərlə bağlı rəsmi şərh verməsələr də, qeyd olunan maksimum rəqəmlərin standart deyil, daha çox fərdi hallara şamil olunduğu bildirilir. Məlumata əsasən, konsern gələn ilin sonunadək təxminən 8 minə yaxın iş yerinin ixtisar olunmasını hədəfləyir.

Təqdim olunan proqram işçilər tərəfindən o qədər böyük maraqla qarşılanıb ki, kadrlar şöbəsinin müraciət portalı axına tab gətirə bilməyib. Nəticədə şirkət daxil olan müraciətlərin operativ şəkildə emal edilməsi üçün prioritetlər müəyyənləşdirməli olub.

Proqram şərtlərinə görə, əməkdaşlar 2027-ci ilin mart və ya oktyabr ayında şirkətdən ayrıla bilərlər. Erkən ayrılıqlar üçün isə əlavə olaraq turbo bonus nəzərdə tutulub.

Ödənişin ümumi məbləği hər bir işçi üçün fərdi şəkildə hesablanır və bu vəsaiti birdəfəlik məbləğ və ya pensiya hesabına köçürmələr daxil olmaqla beş müxtəlif üsulla əldə etmək mümkündür. Eyni zamanda, bəzi keçmiş işçilərə yeni və ikinci əl avtomobil alarkən xüsusi endirimlər kimi müəyyən güzəştlər də saxlanılacaq.