Ən sağlam zeytun növü bəlli oldu: Rənginə diqqət edin

AzadAzərbaycan xəbər verir ki, aparılan araşdırmalar zeytunun faydalılıq dərəcəsində rənginin deyil, yığım vaxtı və emal üsulunun həlledici rol oynadığını göstərib. Ekspertlər bildirirlər ki, orqanizm üçün ən dəyərli zeytun bənövşəyimtil və ya alaca rəngdə olan, yəni yaşıldan qaraya keçid mərhələsində yığılan növüdür.

Məhz bu yetişmə dövründə zeytunun tərkibindəki oleuropein kimi tanınan polifenol və antioksidanların səviyyəsi maksimum həddə çatır. Bu birləşmələr hüceyrələri zərərli təsirlərdən qorumaq baxımından xüsusi əhəmiyyət kəsb edir.

Tam yaşıl yığılan məhsullar acılığının aradan qaldırılması üçün bəzən kimyəvi emala məruz qalır. Tam qaralmış zeytunlarda isə faydalı maddələrin miqdarı azalır. Mütəxəssislər xüsusilə süni yolla qaraldılmış hamar zeytunlardan uzaq durmağı tövsiyə edirlər.

Ən təbii seçimlər sırasına ağacda birbaşa yetişən "xurma zeytunu" və yalnız qaya duzu ilə fermentasiya olunan alaca zeytun daxildir. Hər gün bir ovuc təbii alaca zeytun istehlak etmək həzm sistemini nizamlayır və ürək-damar xəstəliklərinin qarşısını almağa kömək edir.