İran rəsmisindən İrəvana sərt xəbərdarlıq: Qırmızı xətlər xatırladıldı

AzadAzərbaycan xəbər verir ki, İranın Ali Rəhbərinin beynəlxalq məsələlər üzrə müşaviri Əli Əkbər Vilayəti Ermənistana xəbərdarlıq ünvanlayıb. O, "İttilaat" qəzetində dərc olunan məqaləsində İrəvanın həyata keçirdiyi siyasəti sərt şəkildə tənqid edib.

Vilayəti Ermənistan parlamentində "Tramp marşrutu"nun təsdiqlənməsinə toxunaraq, bu layihənin ratifikasiyasını nəticəsiz və ölkə əhalisinin maraqlarına zidd addım kimi qiymətləndirib. Onun sözlərinə görə, mövcud hakimiyyətin zərərli qərarlarından biri də Bakı ilə İrəvan arasında münasibətlərin gərginləşdirilməsidir.

İran rəsmisi vurğulayıb ki, Tehran regionun təhlükəsizliyinin qorunmasını öz məsuliyyəti hesab edir. O, Zəngəzur dəhlizinin açılmasına qarşı çıxaraq, bunun İranın xarici siyasətində əsas "qırmızı xətt" olduğunu diqqətə çatdırıb.

Sonda Vilayəti Ermənistan hökumətinin Qərb dövlətlərinin təsir dairəsinə düşməsini də tənqid edib. O, bu cür yanaşmanın Cənubi Qafqazda sabitliyi daha da poza biləcəyi barədə xəbərdarlıq edib.