Lənkəranda tanınmış iş adamının meyiti qamışlıq ərazidən tapıldı

Lənkəranda çöllük və qamışlıq ərazidə 64 yaşlı yerli sakin, iş adamı Ramiz Bəxtiyar oğlu Əliyevin meyiti tapılıb.

Məlumata görə, mərhum iki gün əvvəl ov etmək üçün həmin istiqamətə gedib və geri qayıtmayıb. Aparılan axtarış tədbirləri nəticəsində onun cansız bədəni Ürgə kəndi ərazisində aşkarlanıb.

Hadisə yerinə baxış keçirilən zaman mərhumun baş nahiyəsində xəsarət izləri müəyyən edilib. Xəsarətin ehtiyatsızlıq nəticəsində yıxılma, yoxsa başqa səbəbdən alındığı hələlik məlum deyil.

Meyit müayinə olunmaq üçün Məhkəmə Tibbi Ekspertiza və Patoloji Anatomiya Birliyinin Masallı rayon şöbəsinə göndərilib. Ölümün dəqiq səbəbi ekspertiza rəyindən sonra bilinəcək.

Qeyd edək ki, Lənkəranda restoran sahibi kimi tanınan Ramiz Əliyevin ölümü ilə bağlı rayon prokurorluğunda müvafiq maddə ilə cinayət işi başlanıb, araşdırma aparılır.