Şəkidə ağır yol qəzası baş verib: 1 nəfər ölüb, 3 nəfər xəsarət alıb

AzadAzərbaycan xəbər verir ki, gecə saatlarında Şəki-Qax avtomobil yolunun Şəkinin İnçə kəndi ərazisindən keçən hissəsində ağır yol-nəqliyyat hadisəsi qeydə alınıb.

Hərəkətdə olan “Lada Priora” markalı minik avtomobili sərt döngədə sürücünün idarəetməsindən çıxaraq dərəyə aşıb. Qəza nəticəsində maşında olan sərnişin, Laçın rayon sakini, 24 yaşlı Səbuhi Ağazadə aldığı ağır xəsarətlərdən hadisə yerində dünyasını dəyişib.

Hadisə zamanı nəqliyyat vasitəsində olan digər şəxslər - Şamaxı rayon sakini 24 yaşlı Əzəlxan Vəliyev, Goranboy rayon sakini 25 yaşlı Ruhin Əliyev və Mingəçevir şəhər sakini 40 yaşlı Surxan Hüseynov müxtəlif dərəcəli bədən xəsarətləri alıblar.

Yaralılar dərhal Şəki Rayon Mərkəzi Xəstəxanasının Təcili Tibbi Yardım Şöbəsinə çatdırılıblar. Onların müalicəsi tibb müəssisəsində davam etdirilir.